La Usc di Ladins

»Enformé de neves empegnes de lurier e per motives personèi del head coach Marco Liberatore, la Sportiva Hockey Club Fascia Falcons comunica, a una col alenador, la sospenjion del raport de colaborazion. Ge dijon develpai a Marco per l lurier dejout enscin ades, la squadra de Alps Hockey League é stata data su per l moment ai arcedadores Luigi Marchetti e Martino Soracreppa. La sozietà é do che laora per troèr prest n sostitut.«

Chest l comunicat che ai 25 de otober à metù sotessora l mond del Fascia Falcons, che te na prescia se à troà zenza l coach che ti ultimes 2 egn à vidà i Falcons. Vèlch a la dir duta aea scomenzà a se mever jà vèlch temp dant, canche te la partida contra l Linz di 15 de otober no se aea troà Liberatore tel banch fascian, ma sie assistent Luigi Marchetti dessema a Martino Soracreppa. Da enlouta più che na ousc se aea sparpagnà fora anter la jent, da na renunzia a la squadra per n livel de jech massa bas a problemes fisics de Liberatore. Nia de dut chest, tinultima, ma n mudament de intenzions de sozietà e arcedador che i à dezidù dessema de tor strèdes desvalives.

De più, col coment del enteressà, é da poder lejer su La Usc stampèda de vender ai 4 de november.  (Daniele Verra)