La Usc di Ladins

Endesfida per i atlec, ocajion per se fèr na bela raida sportica te lesc da marevea per i paascioné da mont e dapò festa, spas e legreza per duc. L é chisc i ingredienc che met dant la garejèda de corsa sa mont che sera su la sajon da d’istà e che à inom Vertical Bufaure e che la fèsc pèrt del zircuit di Vertical de Fiem, Fascia e Biois.

L event vegn metù a jir per endrez de la Coprativa sozièla Inout en colaborazion con la sozietà di impianc de Bufaure, l Comitat manifestazions de Poza e l Comun de Sèn Jan.

L start de la garedèda vegnarà dat te Piaz de Comun de Sèn Jan a Poza en domenia prum de otober da les 10 da doman e da lo i concorenc jirà su per duta Strada de Meida e dapò su per la erta de Bufaure fin ai 2200 metres de Baita Cuz.

Per tor pèrt a la garejèda se cogn se scriver ite sul sit www.inoutfassa.com. L cost l é de 20 euro per chi che se scrif ite dant dai 29 de setember e de 25 euro per chi che se jonta ite ence dant dal start e l tol ite l pach de gara, la marena, e l trasport con l impiant per vegnir en ju. Per aer de autra informazion se pel scrivere a info@inoutfassa.com o chiamèr i mumeres 333 1741081 (Macia) o 349 6491192  (Thomas Zulian)