La Usc di Ladins

Per l secondo an l Genoa à cernù Fascia per tachèr ite sia pre-season, si arcedamenc, la prejentazion de la squadra, la partides da peconc e l camp per i joegn de la sozietà.
L Genoa, l club de balon più veie de la Tèlia, ruarà te Fascia dai 13 ai 26 de messèl. L an passà d’istà presciapech 6-7 mile sostegnidores é rué te val ti 15 dis che Badelj e compagnes se à arcedà a Moena. 
La formazion ligure de mister Alberto Gilardino sarà ghesta al Wellness Hotel Dolomia de Soraga e i alenamenc e la partides vegnarà fates desche l an passà sul ciamp Benatti de Moena, de gra al suport tecnich de la Monti Pallidi.

La Monti Pallidi fèsc ence a saer che, col sostegn de la SIF Lusia, l’à metù fora endodanef l bando stipendium per i studenc-atlec de ic e eles scric ite a la sozietà con chela de didèr la families, sostegnir l’atività motoria del setor di joegn de la sozietà, la coejion sozièla e l’integrazion interculturèla, favorir la parità de gener e mantegnir n bon livel de sanità. L sostegn economich de en dut 5 mile euro al an jirà ai atlec-studenc che à arjont i miores resultac tant a livel sportif che a livel scolastich. La domanes per tor pèrt al bando pel vegnir portèdes dant a la sozietà fin ai 31 de aost.

De più su La Usc stampèda de en vender ai 5 de messèl.


 (MCI)