La Usc di Ladins

Seghita l moment positif per l Fascia Balon ajache en domenia passada l é ruà la venta contra l Piné.
Taca sobito ben i bec de mister Capovilla che do 9 menuc i passa inant con n schem da trata dal cianton. L nef ruà, l clasc 1992 da Rèba Roberto Del Negro, ge passa l balon sul or de l’area de rigor a Massimo Lorenz de Meca che l tira e l met l balon te sach.
Na endesfida da doi musc per i bec de president Trottner che i se porta a ciasa i 3 ponc enceben che i aesse risćià belebon, fossa benfat che no i aesse chisc arbassamenc de conzentrazion. Aboncont i proarà a se portar endodanef i 3 ponc a ombria de Sas da le doudesc en domenia contra l Perjen a Perjen da mese le 3.

De più su La Usc nr 42 dai 31 de otober, con classifica e resultac de la squadres mendres. Se pel la troèr ence te la boteighes de sfoes e sul sit www.lausc.it se per fèr l abonament al e-paper per aer azes vigni vender a dut l sfoi sul fonin, tablet o computer.



 (Pierpaolo Rasom)