La Usc di Ladins

En domenia ai 22 de mèrz se à serà su a Andalo i campionac trentins de schi de la categories Ragazzi e Allievi di zircuic Oros e Itas Mutua. Doi fins de setemèna piens de garejèdes: ai 13 col slalom strent, ai 14 col slalom lèrch, ai 21 e 22 con l superG e ai 22 col skicross e chiò l é stat n muie de confermes e pecia neves.

Tacon ite col slalom strent: te la categoria Allievi prum post per Carolina Mobiglia e Giovanni Ceccarelli del FassActive, doi atlec che à fat resultac ezelenc endèna duta la sajon. Per chel che vèrda la eles uzon fora ence Nicole Bonelli, semper del FA, ruèda 4^ tanche ju dal podie e l 7° de Elisa Valentini (FA) e anter ic l é l 5° post de Nicolas Rasom del Ski Team Fascia (chisc doi ultimes atlec é scric ite tel Ski College de la Scola Ladina) e l 6° de Andrea Giacomelli semper del Ski Team Fascia. Te la categoria Ragazzi de ic l titol de campion trentin é jit a Emil Riz del Ski Team Fascia, al 5° post troon Erik Depaul del FassActive. Anter eles enveze la mior atletes l é stat Camilla Forti ruèda 6^ e Valentina Amato del Monte 7°, duta does de la Monti Pallidi.

Tel slalom lèrch autra venta de Ceccarelli te la categoria Allievi e de Gregorio Buffatti ti Ragazzi che à vent ence l superG e l skicross.

Chisc doi atlec se à metù al luster ence ence tel 44° Trofeo Pinocchio sui schi sul Abetone, tant te la garejèdes che aea valuta per l titol nazionèl states ai 24 e 25 de mèrz che ence te cheles per l titol internazionèl dai 26, 27 e 28 de mèrz.

Podede lejer dut su La Usc dai 3 de oril da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)



 (Monica Cigolla)