La Usc di Ladins

Ra lascia donca 1.850 parsones zenza el so dotor. Ra Ulss 1 da Belun r’à inprometù che ra mandarà calchedun, almanco par stopà el busc, e ‘pò se vedarà. Ma ra storia ra podarae deentà ancora pi burta: somea che anche outre dotore, de chi che laora in Anpezo, drio ra families, chi che vien in ciaśa, i fesc fadia a ciatà un anbulatorio agnó fei el so laoro. E ‘pò i scomenza a ese inaante co i anes, i no n’é pi coscita śoen. Chera de i dotore che mancia r’é ‘na situazion che se vede nafré daparduto, par duta r’Italia, ma ca da nos podarae ese ancora pi grea, anche parcé che no son in zità, son indalonśe da i ospedai, e son un paes fato pichesee de vece, de parsones che à biśoin. Par dute, par ra aministrazios de chiste luoghe, par i politiche da indalonśe, chesto ‘l arae da ese el prin pensier, e inveze somea che see algo che conta demanco.