La Usc di Ladins

Mercui ai 16 de luio ‘l é stà ra prima ciacolada su ra storia, ra cultura, ra parlada, ra tradizios de ra śente ladina e de Anpezo. Sto an ‘l é manco caminades fora via, se stà depì par piaza; ‘l é mercui ai 6 de agosto che se śirà a Pezié de Parù, agnó che ‘l é el Ru de ra Verjines, a contà ra storia de Merisana, de el laresc, drio ra lejendes de ra Dolomites, con Susy Rottonara.
Sta prima ciacolada i r’à fata inze ‘l ufizio de r’Ulda, sote ra Ciaśa de Comun. L ea un grun de śente a scotà. Ignante ‘l é stà el saludo e el bon azeto de Elsa Zardini Soriza, presidente de ra Union de i Ladis de Anpezo e de ‘l istituto cultural ladin Cesa de Jan de Col de Santa Luzia. Dapò Marco Dibona Moro ‘l à portà par man chesta parsones par doi troes: un prin da contà algo, in curto, de ra Regoles d’Anpezo, canche ‘es nasce dasen, riconosciudes da ra leje 1102 del 1971, e intrà dute chi outre laore, par el bosco e su ra monte, ‘s à scomenzà anche a lourà par ra cultura del paes, co ra comiscion del vocabolario, co i musee de arte, chel etnografico e chel de i fosiles. Da ra Regoles nasce anche r’Ulda, de outon del 1975.

De plu tla edizion stampeda de La Usc di Ladins o sun l e-paper a paiament www.lausc.it/e-paper