La Usc di Ladins

Fenì co i laore, ades 'l é ruà r'ora de fei ra proes, inze a Fiames, par el vilajo de ra Olimpiades e Paralimpiades d'inverno 2026. I à parecià 377 ciaśetes, ruades ca in Anpezo su ra rodes, par stradon; stajarà inze 1.400 parsones. Dapò sarà outre luoghe, agnó che i atletes i podarà stà aduna, se conosce, se parlà, ma anche fei alenamente, magnà. Ra setemana che vien i fajarà duta ra proes tecniches che ocore, ignante de bete inze ra śente, i mesc de febraro e de marzo del 2026, par ciatà alośo su ra Dolomites. Sarà i atletes del sport che i fesc in Anpezo: i schie de ra femeens; el bob, el cocio e el skeleton su ra pista de Ronco; el curling par ra Olimpiades. Dapò dute i schie e ra brea de ra Paralimpiades. Su chel pian, agnó che 'l é ra pista de el vecio aeroporto, el laoro 'l é śù inaante polito, par Fabio Saldini, comisario de governo par ra operesolimpiches e aministrator de ra Società infrastrutture Milano Cortina, che r'à fato el laoro: «Duto prozede drio i tenpe che aon dito. Ades fajon el stress test, valadì se proa duto chel che ocore par vive inze chel vilajo olimpico. Na ota depì ra profescionalità e el bon laoro i à pagà. De chesto i digo gramarzé ben a duta ra parsones che à lourà par darśonśe sto tanto».

De plu tla edizion stampeda de La Usc di Ladins o sun l e-paper a paiament www.lausc.it/e-paper