La Usc di Ladins

N pèr de ores passèdes adum con n grop de jent (en verità béleche dut eles), a na vida lijiera, informala e gustegola, ma olache se à podù vegnir a saer n muie de picola neves che pel ne didèr te la vita da vignidì.

Coscita la é stata te la pruma scontrèda che é stata metuda a jir te Comun general en mercol ai 15 de jené, tel chèder del projet #Fuoricentro per endrez di servijes sozièi del Comun general, che ensema con la Scola de Fascia e autra istituzions e sociazions porta inant te Fascia la scomenzadives de chest projet de la sociazion »Con i Bambini« adum con la Fondazion Trentina per l Volontariat Sozièl.

L tem metù dant l’era chel del bilanz de cèsa, con consees per esser bogn de tegnir sot eie la speises e ence de sparagnèr con n eie ascort a l’ambient.

L’assistenta sozièla Marinella Fanti à portà l salut de Paola Rasom, responsabola di servijes sozièi del Comun general, e l’à prejentà  Mattia Mascher de CBS (Community Building Solutions) de Trent, na sozietà che se cruzia de promozion e formazion ti setores de l’ambient, sparagn, sostegniboltà e welfare comunitarie.

Dant da dut l’é stat prejentà n video metù sul sit de n sfoi de nonzech nazionèl olache la jent vegn engaissèda a »sparagnèr« vardan de se caparèr l maor numer possìbol de articoi a priesc n muie bas, stajan semper ascorc a se emprevaler de zedoles e ocajions de rebas. La riflescion vegnuda fora sobito dal grop à metù al luster che perder ores a ge stèr dò ai rebasc e se empienir la majon de roba che no se doura demò pecheche la é bon marcià fosc no l’é la vida miora de sparagnèr.

Mascher à dit che tegnir sot control l bilanz de cèsa per trei meisc l’é assà per entener colunes che l’é la speises maores e coche se podessa sparagnèr vèlch. No serf doventèr mac, se pel ence meter a stim vèlch speisa desche l café che se fèsc ogne dì. Tegnir chest bilanz ensema coi fies l’é ence na vida gustegola per i fèr sentir pèrt de l’economìa de cèsa e ge ensegnèr a tegnir cont e anchecondì se pel l fèr ence con app aposta, desche per ejempie »fastbudget« o »monefy«.

Te la scontrèda l’é stat portà desvaliva esperienzes de compra sostegnìbola, per ejempie con i GAS (gropes de compra solidala) e aziendes de produzion locala, l’é stat rejonà de l’enteress semper maor per i marcé de roba de seconda man che vegn metui a jir ence te noscia valèdes (a Stalimen vigni sabeda) e l’é stat fat valutazions ence su la compres tel web, olache l’é vera che se pel sparagnèr, ma ge vel ence stèr n muie ascorc a no vegnir gabolé e no se pel desmentièr nience l cost indiret: chel ambientèl che a la fin l’é n cost che paon duc canche l’é dejastres e chel per l’economia del teritorie, ajache se la picola boteighes sera vegn a mencèr n servije per duc.

Mascher l’à dat consees de utol ence per schivèr l »sniffing« di dac personèi tel web e per cerner soluzions più ecologiches canche se va a proveder o se endreza evenc: con pìcola azions desche per ejempei beiver èga de spina, meter lampadines LED, destudèr i aparac enveze che i lascèr en stand-by, se pel dassen sparagnèr n muie, apede che fèr vèlch de utol per l’ambient.

Dò na seconda scontrèda su l’educazion digitala endrezèda te Sorastanza de la Scola en mercol ai 22 de jené, via per d’aisciuda vegnarà metù a jir amò vèlch apuntament per emparèr a se fèr enstesc l saon per se lavèr i ciavei e a ge dèr neva vita a la plastica… e sarà ence na scontrèda de poetry slam.


 (Lucia Gross )