La Usc di Ladins

»Canche l’é vegnù l’emergenza ence noi aon fat chi 20 dis de carantena per sens civich, dapò aon tacà a se endrezar per poder endò pear via con l’atività e portar le pizze fora per le ciase. La jent tacaa a padir mingol l’isolament, i me domanaa, e coscì me é enformà per aer dut en regola per poder pear via.« Coscita ne disc Daniele Pezzei de la Pizzeria Ramon de Pera, l prum che te val à tacà a portèr fora la pizzes te la cèses, ensema con Giuseppe Costantino de El Resolé de Dèlba e a Fabrizio Fox Florian del Nibada a Moena che porta fora crofegn e magnadiva più da fast food, e a El Mas porta ence n bast complet. 

Daniele l se à enjignà dut per tacar l prum de oril. »Aon comprà i contegnitores termics per poder sanificar dò ogne consegna e crigne de plastica da poder sanificar ence chele, se aon enjignà manece, couribocia, veiares e alcool per desenfetar, per la consegna e ence noi che fajon le pizze con duc i despositives aldò.«

Apontin chi dis l’é vegnù fora na neva ordenanza, che permet che i ejercizies de soministrazion posse portèr fora la magnadiva, ma la empon n obligh per l meso durà per la consegna. »Per l pian de autocontrol HACCP e dut l’endrez che se cogn aer per garantir la sanità no l’era problemes, ajache se l fasc semper per ogni roba, enveze peer la consegna te la Talia l’é pervedù che se posse jir con n meso de l’azienda, ma l’ordenanza domana n »autocarro«, per chest é tout a fit n furgoncin da Atesina Noleggi per esser a post con dut. Aon tout personal aposta per la consegna, ge aon dat dute le istruzion e aon vardà de no sparagnar sui materiai per arsegurar la calità e na consegna perfeta. Luron dal mesdì e da sera, ma l lurier gran l’é da sera. L prum dì sion rué a portar fora 150 pisze anter mesdì e sera, dapò ben segur sé che l’é perché al scomenz che siane i soi e la jent spetaa. Ades sé che n’é de autres che é dò a tacar: la jent la é contenta, perché i disc che con na pizza, enceben che i cogne star a ciasa, ge sà jà na festa.«

En jebia ai 2 de oril l’à tacà sia consegnes ence la Pizzeria El Resolé de Dèlba.

L patron Giuseppe Costantino ne à contà che per se endrezèr e fèr dut en segureza ic tol sù la ordenazion e i mana l scontrin domesdì per whatsApp, domanan che i enjigne i scioldi te na soracuerta serèda con su l’inom. »Aon n cest olache ic pel meter i sciondi, coscì no l’é nesciun contat e ge domanon che i mete n picol desch o na cariega fora da usc per pojèr le pizze, che dapò i pel se le tor. Nos aon maneces che mudon a ogne consegna, couribocia Fpp2 e couribocia chirurgich sora, donca aon dut en regola, gé son ence ti studafech, sé benon colunes che l’é la precauzions e peisse che l pian de autocontrol che aon fat dae l maor livel de segureza possibol. L’é na gran domana e podassane fèr ence de più, ma aon volù se fermèr a na setantina de pizzes che ne dèsc l met de fèr dut l lurier ence per les imbalèr e fèr dut con duta la segureza.

Nos jon fora de doi, un vida demò e un fèsc demò la consegnes e per chel che vèrda l meso, aon l’auto de l’azienda. Sun chest l’é mingol de contrast anter l codesc de la strèda e l’ordenanza, ma é domanà a la stadale de Trent e i me à dit che son a post. 

Endèna fajon da la jebia a la domenia, dapò ge vel veder coche muda la situazion e la normatives, no podon saer coche la jirà inant. Nos assane podù ence stèr sun canapé, ma l’é n servije emportant, e l vedon ence canche da sera aurion la bustes, che l fajon demò a la fin per no ciapèr ite te scioldi fin canche aon fenì l servije. Veide che l’é ence jent che lascia scrit na dedica, n develpai percheche ge dajon l met de aer n moment de legreza e de relax te chisc tempes senestres.«  (Lucia Gross )