La Usc di Ladins

A jir a pe tel bosch se se n adasc de cotenc viai e troes che amò é seré fora per via de piante crodade. No se trata de piante restade via per jabas dò l tormen Vaia ma de chele crodade jù con l peis de la neif e l vent de chest invern passà. Na situazion che no podea restar coscita, soraldut ades che scomenza la sajon da d’istà e rua foresć che va a pe tel bosch. Coscita n bel grop de volontadives da Soraga se à pissà de jir a librar fora i troes.

»Duc chenc jon trop a pe tel bosch – ne à contà Umberto Zulian de la sociazion sportiva 3Esse – e aon vedù che te tropes posć no se podea passar. Noi cognoscion l bosch e ge fajon ence la outa a le piante crodade ma n muie de jent, canche la veit che no se pel passar, la dasc de outa e chest l’é n pecià. Siane de na bela squadra – disc Umberto - percheche ensema ai volontadives de la 3Esse l’era ence autre persone che ne didaa. L’era Ettore Rossi, Sandro Pellegrin, mie fra Luca, Augusto Vian, Michele Decrestina, Andrea Pellegrin, Alessandro Motta, Daniele Sommadossi, Stefano Giuliani, Paolo Pederiva, Elio Decrestina e Mario Zulian. E dapò l’é vegnù ence na squadra de volontadives de la sociazion di giagres: Luca Tomasello, i frades Antonio e Fabrizio Pellegrin de Zach coi fies Alex e Davide, Damiano Pederiva, Mario Braido e Luca Pedergnana.

Noi aon taà le piante chel tant che serf per le spostar e librar fora la strada e le aon lasciade ló sul post, da na man via. L’aon fat se tolan duta la responsabilità, ben segur ge aon fat a saer al Comun e al Servije Forestal che jiane a librar fora i troes. L’aon fat ence mingol per dar n segnal, per ge dar gaissa a autres volontadives de autres paìjes percheche n’é amò n muion de troes seré fora, olache no se pel passar. Noi eraane dut jent che sà lurar tel bosch e sion jic con ogne precauzion, sion stac ascorc.


De più su la Usc nr 24 stampèda ai 19 de jugn  (Monica Cigolla)