La Usc di Ladins

Chest an 2020 fossa stat per la Musega da Vich n an da recordar sul calandar. L sarà pa ben istesc, ma no per le rejon che si componenc se aea metù dant. Belapontin chest an i aea en program n grum de scomenzadive per festejar i 200 egn.
Enceben che la festa grana te tendon no posse vegnir fata, i museganc no se à lascià destrameter e i é jic inant col program, per chel che i à podù. I à endrezà na bela mostra te Ciasa Marmolada, inaugurada l dì de Sènt’Uiana, che se pel veder fin ai 8 de setember, i à metù fora na gran banca śala te piaz de Vich per se far de gustegoi selfie, i à fornì sù doi beloc ciantogn te la boteiga del Pech e tel bar Pé de Bosch e da pech l’é stat portà a compiment ence n auter bel projet: l Troi de la Musega da Vich. Se trata de n percors tematich, na bela raida da far a pe, sorida e anter pré e bosć, che ponta demez dal piaz de Valacin e rua su fin sun Pianac, n lech da olache se pel se goder n paesaje da marevea. L percors é segnà bel delvers su la pruma gran tabela de legn che se troa te piaz dai auti e dapò sun ogne crouscdevìa l’é stat metù ence na lingia de frize. Jan dò chest troi se pel cognoscer n muie de aspec de la Musega da Vich, soa storia, le tradizion del paìsc e de la comunanza, i strumenc e i guanc.

De più su La Usc 31 de vender ai 7 de aost  (Monica Cigolla)