La Usc di Ladins

L’Union di Ladins de Fascia é stolza de poder portèr dant e fèr cognoscer n nef liber de Fernando Brunel. Dò i trei volumes »A spas per la Ladinia«, Brunel ne met dant »Mie istà sun Tamion«, che conta i recorc del 1961 de l’autor che »con so scriver lijier e piajegol, somea beleche de l sentir contar a l lejer, l ne fasc reviver la vita da bacan di egn Sessanta«, descheche scrif Antone Polam dal Maester te la paroles dantfora.
»Fernando l’era n bez de 13 egn canche so pare l l’à manà a far l paster sun Tamion – disc amò Polam. Ruaa i prumes foresć, sun stradon passaa valch auto ma la vita de la jent de Tamion la jìa dò l jir de le sajon, di dis; lurar da n scur a l’auter, te stala, ciamp e pra.«
La publicazion porta dant passa 200 piates scrites a na vida scempia ma rencurèda, con l stil originèl e carateristich che aon emparà a cognoscer te etres libres de l’autor, l’é fornì ence de bie retrac che la jent de Tamion à tirà fora de crigna per l’ocajion e de vèlch chèder de l’autor che, estra che scriver, l depenc la natura e l teritorie con colores vives e gaerc de gran forza espressiva.
L’é recorc personèi de Fernando, de sie istà da pèster te cèsa con Luijio e Virginia, de la jent da Tamion, recorc de n istà particolèr che l’é restà te sie cher e che ades l vel spartir con duc si letores.

Fernando Brunel prejenta sie nef liber en sabeda ai 10 de otober da mesa les 5 domesdì (16.30) a Soraga te La Gran Ciasa, siede duc envié a tor pèrt!  (Cristina Marchetti)