La Usc di Ladins

I operatores turistics vèrda con cruzie a la neva sajon da d’invern. La pandemìa da Covid cor, semper più en prescia, e ence i contages somea che no i aesse mai na fin. Endèna che se speta de aer na situazion mìngol miora, soraldut dal pont de veduda sanitèr, ge dajon na veièda a coche la é jita la sajon del turism da d’istà e a la prospetives per l’invern ensema al diretor de l’Apt de Fascia Andrea Weiss.

A ge vardèr a la statistiches metudes fora da l’Apt se veit che l’istà passà l’é stat n smendrament de jent, ma no la é jita nience tant mèl…
Andrea Weiss Segur respet a le previjion che aane fat la é jita miec, pian pian aon scomenzà via la sajon coi week-end lonc, dapò dò mez messal l’é ruà jent che se à fermà setemane entrìe, aost l’é stat beleche sui livìe de l’an passà e setember l’é jit n muie ben. L’é da dir che per na valutazion completa mencia n muie de jent che é stata te le seconde ciase, chisc numeres no i vegn fora te le statistiche. Aboncont respet a le previjion zompe de l’aisciuda, l’istà l’é jit segur miec de che che se se pissaa.

La jent à preferì la mont al mèr percheche te gregn spazies a l’averta l’é manco gran l risech del contage.
Ei, ma chel che volesse sotrissar l’é stat l gran empegn di operatores turistics de se tor sù ogne sort de mesure per no se troar te situazion de dificoltà a gestir l virus. Se à vedù da autre man, te autre region, che no la é stata coscita e donca na lauda a duc chi che se à dat jù. Dalbon sion te n sistem che se fossa stat n fal de valgugn ge aessa jontà l’economìa de duc. Aldò del resultat arjont l’é passà l messaje te anter la jent e i operatores turistics de aer abù na gran responsabilità e na gran atenzion a no ge portar dan ai autres.

De più su La Usc 46 di 20 de november  (Monica Cigolla)