“L’é bel e ge vel festejèr l scomenz de n nef an, se l’é meso con noscia jent – scrif Valentini. L’é na usanza che ne porta a pissèr a l’an che é dò a fenir, rengrazièr per chel che aon abù de bon e pissèr a chel che enveze no é jit ben, se auguran che la robes negatives se sere sù.
A la fin de chest an 2020 caraterisà da padimenc, dejèjes e tema per l davegnir, sarà bel l saludèr, saer che l se sera sù, ma chest passaje à da vegnir fat a na vida desferenta da coche fajaane ti egn passé. A na vida desferenta da coche se aane, o fosc i ne aea, usà a fèr. Magari con maor respet
View the embedded image gallery online at:
https://www.lausc.it/valedes-ladines/fascia/14419-nanef-aldo-de-la-cultura-de-la-jent-da-mont#sigProId42e157f83b
https://www.lausc.it/valedes-ladines/fascia/14419-nanef-aldo-de-la-cultura-de-la-jent-da-mont#sigProId42e157f83b
Da semper gé no aprijie i boc che vegn fat scopièr, ma chest an me sà che i carenee amò de manco col temp che sion dò a viver. I à demò l fin de fèr ac e no i à nesciugn valor, i vegn venui desche jeghes ma vèlch outa i pel ence esser pericolousc.
Peisse che ence te chesta ocajion – disc amò l conseier de procura - se posse palesèr legreza a na vida che vae più aldò de noscia reijes de jent da mont, che la é per tradizion più chieta e resservèda.
Per mie cont i boc de Nanef no l’é na forma de devertiment, alincontra i me dèsc demò d’empaz, e se chest pel esser sogetif, l’é segur che chesta usanza abie desvalives aspec negatives.”
Valentini recorda che i boc fèsc entesseament acustich, i soscedea tema te la besties, tant cheles del bosch che cheles de cèsa, che bendeché sozet che dal spaent les sciampe e no les vegne più troèdes.
Da spes dapò l’é l pericol de azidenc a persones e de feghes. Ampò ge vel conscidrèr ence i scarc e i refudames de chisc boc che no vegn regoet e che la dì dò se troa fora per la strèdes de paìsc.
Per chesta rejon l Conseier de Procura auza fora la speranza che chesta burta usanza culturèla, che no à nia a che fèr con noscia tradizions ladines, la vae dò brea jù per ge lascèr l post a na vida de festejèr più sćiantiva, e che chesta picola revoluzion posse vegnir touta sù dai joegn de Fascia, che i vèrde con n eie pù ascort a nosc ambient e che i ge passe chesta cultura a si fies travers l’ejempie.
Amedeo Valentini fenesc fora sie messaje a la comunanza coi miores augures per la fin de chest an senester e percheche l nef 2021 posse esser mior e ge portèr serenità e legreza a duta la jent de Fascia.