Neves codejes numerics per l Zenter de Prum aiut

Data

13 de auril 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Col scomenz de oril l’é jit en doura l sistem nazionèl de codificazion per miorèr l’assistenza ai malé.
Neves codejes numerics per l »triage« del zenter de prum aiut, che fossa canche l malà l vegn tout dant e vegn valutà sia condizion clinica ge dajan sù i codejes che fèsc fora la prioritèdes per l’assistenza.

Col prum de oril, i cater codejes de color duré enscin a ades (checen, śal, vert e bianch), i vegn implementé con cinch codejes con numeres, co la valutazion de la situazion da chela più ria (1) a chela manco ria (5). L’obietif del passaje al nef sistem l’é chel de dèr na miora assistenza per l malà e arsegurèr n sistem de triage pervalif a livel nazionèl, aldò de chel che vegn metù dant dal Minister de la Sanità te la desposizions de endrez nazionèles del 2019, metan vèrda soraldut ai sogec con problemes psicosozièi, per meter a jir na dreta valutazion e, jà dal scomenz del percors de cura, tor en cèria la persona coche carenea.

Con semper più jent che rua te zenter de prum aiut zenza apuntament e l smaorament de la domana de prestazions sanitères, l’é entravegnù l besegn de definir endodanef la modalitèdes per la prioritèdes de azes a la vijites mediches.

L nef sistem de codificazion l passa donca dai 4 codejes de triage en esser enscin a ades a n sistem de cinch codejes de priorità e temp de spet pervalif sun dut l tegnir nazionèl: codesc checen (1), codesc pomaranc (2), codesc brun chièr (3), codesc vert (4) e codesc bianch (5).

De più su La Usc stampèda de en vender ai 16 de oril del 2021.