La Usc di Ladins

L’à i eies che sgalizea Sergio Rossi endèna che l me aur i ujes de la cambres de sie nef hotel, ujes che se spalanca ogne un sun n melaur desferent. L’é l’èrt la protagonista de ezelenza, te la cambres, te la hall, te la sala restorant, su per la scèles, te ogne piz e cianton l’é n chèder, na statua, n’opera.
Se respira l’èrt fin te la megola tel nef Art Hotel ‘Locanda degli artisti’ a Cianacei. L’era la veia penscion Genzianella che Sergio à gestì per trei egn, dapò l l’à comprèda, trata jù e refata duta da nef. Ades l’é n hotel da 4 steiles con 20 cambres, bistró e restorant.
»Son semper stat pascionà de art – ne disc Sergio Rossi – é tacà de 15 egn a colezionar cadres. Na colezion che col temp é doventada semper maora e de valuta. É volù far n hotel che conte de art, che fae cognoscer le opere di artisć del post, ma ence chele di ladins, trentins e internazionai. Na strutura che se lea a la TanArt, la galarìa d’art chiò apede.«
Èrt donca, jà sul parei defora de l’hotel fèsc bela parbuda n gran depent de Alberto Detomas che à decorà ence la cambra dedichèda al pitor futurist trentin Depero. Chesta l’é una de la perles de l’hotel con la reproduzion de duta la mobilia (lec, comodins, armer, desch) touta dai projec originèi firmé da l’artist da Rorei, che é taché sù sui parees, e coi colores forc carateristics. Sul celor la copia de n sie chèder, ence chesta de Alberto Detomas.
Amò, semper defora sun barcon, na gran statua del scultor Matthias Sieff e anter i artisć fascegn l’é ence la operes de Inge Detomas, Sebastiano Vian e Luigi ‘Igi’ Pederiva. Da la cèsa del pitor da Soraga, che Sergio à semper aprijià n muie ma che l disc »l’é stat pech valorisà« vegn l’inom de l’hotel ‘Locanda degli artisti’. Canche Igi l’é mort – ne disc Sergio – i ge à cambià inom a la ciasa olache l stajea e l’aea la berstot, a mi me endespiajea che l vae perdù e coscita l’é tout sù gio.«
L’à na storia ence l logo de l’hotel. L vegn da na statua de Feliciano Costa Parolot, na scultura che la familia Rossi aea comprà jà acà 20 egn. Manolo, fi de Sergio, che l fèsc l’architet e l’à studià fora ence duc i spazies espositives de l’hotel, l l’à stilisèda e l’é doventà n logo perfet e distintif.

De più su La Usc stampèda de en vender ai 28 de mé del 2021.  (Monica Cigolla)