La Usc di Ladins

Apede a la neva de l’orida de la ‘Locanda degli artisti’ a Cianacei l’é ence n’autra strutura neva che à tanche avert te Fascia. L’é l prum hotel a 5 steiles, l’é a Vich a l’à inom Hotel Ciampedie. L’é de la familia Peretti che te Fiem l’à autres doi alberghes, l Rio Stava e l Lagorai. Nos aon rejonà con Alessandra che lo gestesc ensema a sia fia Sofia.

Perché pa aede dezidù de investir ence te Fascia?

Alessandra Peretti Per desferenziar noscia oferta. Aane l met ence de investir te Fiem ma fossane jic a se far concorenza enstesc. Ajache sion n muie leé al teritorie da mont, aon dezidù de vegnir te Fascia. L’era l’ocajion de comprar l veie hotel Genzianella, che l’era en malora da egn, ence se la posizion no la é ecezionala percheche l’é anter le ciase.

Perché pa n hotel a 5 steile?

Aon investì tant e se aon dit che assane podù proar. L’é na endesfida te chela che cherdon n muie, l’é vera che l’é na responsabilità n muie grana ma son segura che chesta endesfida sie de valuta ence per l teritorie percheche a chesta vida smaoron ence sie valor.

Che desferenza él anter n hotel a 4 o 5 steile?

Le steile le pel vegnir tacade fora, ma la desferenza l’é l livel del servije che cogn pontar a l’ezelenza.

Noi aon 46 cambre e ponton a na clientela de gregn percheche l’é na strutura no adatada ai bec picoi. Aon fat n gran zenter benesser con 5 saune desvalive e doi nodadoe, una daite e una defora percheche pisson che te n hotel a 5 steile l ghest se n prevale de più di servijes che ge vegn sport, ma i cogn esser de calità.

Duta l'intervista su La Usc stampèda de en vender ai 28 de mé del 2021.

 (Monica Cigolla)