La Usc di Ladins

Cina ciamó él te Südtirol ma dui paisc dl alpinist: Matsch tl Vinschgau y Lungiarü tla Val Badia. Scebëgn che i paisc é te dui ciantuns daldöt desvalis dla provinzia, ciara i grups de laur impó da mantigní intan de contat, y tan inant che ara vá, ince da mëte a jí cosses deboriada. Insciö vëgnel organisé n ann porom na formaziun por i mënajites y n iade al ann s’incunton ince amez tru por n gosté deboriada, olache an se barata fora idees y esperiënzes. Rodunt pro chësc gosté, l’ann 2024, él tomé na idea particolara da se lié deplü. Y sce an sá che i paisc dl alpinist coltivëia na cultura da jí tla natöra y se tó tëmp da aprijé la morvëia dla munt, ne podô chësc liam nia garaté atramënter co tres munts, jus y valades fora.
Le resultat de chësc lian é le tru "Südtirol quer", tan co Südtirol dal iaicá, n tru che liëia l’ost y le vest de nosta provinzia – pian ia dal parch natural Pöz–Odles rovan cina tl parch natural dla Texelgruppe. Al é na aventöra naturala particolara, che despassa raiuns da munt daldöt desfarënc, valades chîtes, jus, trus, parüs y lec de munt, bosć y pastöres.

Deplü nes á cunté Christof Alfreider dl paisc dl alpinist da Lungiarü, che s’á studié fora la trassa. I podëis lí t’La Usc di Ladins di 19 de jügn.  (pablo)