La Usc di Ladins

Fora per la cèses de Dèlba e Cianacei l é gaissa e enteres per l renovament de l’Asuc pervedù per en domenia ai 7 de november da les 8 a les 17 te sala de Consei de Comun de Cianacei e te sala ite dret piazal de la veia scola mesenes de Dèlba.

L é passà cinch egn da l’ultima litazions e enlouta per Cianacei l’era ruà ite Rinaldo Debertol (president), Silvano Planchensteiner (vize president), Dino Davarda, Maria Assunta Merli e Diego Riz; per Dèlba enveze Olivo Micheluzzi (president), Federica Iori (vize presidenta), Fausto Dantone, Daniele Iori e Martino Soracreppa.

L Comitat l vegn lità da duc i capofamilia de la Frazion e duc i capofamilia pel vegnir lité, bèsta che i abie la residenza de la Frazion da amancol 5 egn. Chest tant l vèl tant per i omegn che per la capofamilia femenes.

Amò apede vegn fat a saer che, enceben che duc posse vegnir lité, per poder tor su l’encèria de conseier de la Frazion ge vel che la persones no les abie jà de autra encèries aministratives tel Consei de Comun de residenza. No pel donca jir ite conseieres, assessores o ombolt del Comun de Cianacei.

Se l capofamilia no l podessa jir de persona a litèr l pel domanèr che vae na persona de familia a sie post, ma chesta domana ge aessa volù la manèr ite al Comun trenta dis dant da la litazion. Donca ades fossa massa tèrt. La lista di capofamilia é da poder vardèr fora ló dal Ofize de la Frazions te Comun de Cianacei. 

Per l Comitat de l’Asuc la nomina no la é politica e no la perveit che vegne metù su listes, duc i capofrazion pel litèr e duc pel vegnir lité.

Vegn fat a saer aboncont che duc i components che l é ite ti Consees de ades i à piajer a jir inant e amò apede l é, soraldut ta Dèlba, ence de autra persones che aessa gust de se meter.

Per Cianacei donca l’é Dino Davarda, Rinaldo Debertol, Maria Assunta Merli, Silvano Planchensteiner e Diego Riz.

Per Dèlba l é Paolo Casagranda, Fausto Dantone (jà conseier), Dantone Sebastian, Samuele Dioli, Daniele Iori (jà conseier), Federica Iori (jà conseiera), Livio Iori, Olivo Micheluzzi (jà conseier), Christian Planchensteiner, Filippo Redolfi, Martino Soracreppa (jà conseier) e Igor Soraperra.   (VR)