La Usc di Ladins

»Gente dei Monti Pallidi. Vita Cultura Ingegno« l é l sot titol de n gran liber che rejona del raion dolomitich e de sia jent. A chesta jent e a duc chi che te chisc lesc i vegn da ghesć l se ouc con spirit avert, divulgatif, che vel ge dir n muie de robes ma ence mingol ge struchèr n eie, e che se palesa delvers tel titol ladin »Bondì Dolomites«.

La neva publicazion l é frut de na idea de Alfredo Weis, ladin da Vich con na storia de empegn profescionèl desche diretor de la Coprativa de Fascia e de empegn sozièl e aministratif dejout te desvalives setores e soraldut desche president de la Marcialonga. 

Weiss à fat dut l lurier per l liber ensema con Renato Constantini n ladin da Ampez, enciasà oramai da passa 10 egn te Fascia, olache a Vich l à l Hotel Dolasilla, ma dant, da canche l era joen, ensema con sie fra Dino e n auter sozio l é stat patron de la maor tipografia de Cortina, la Print House, fin canche l à dezidù de passèr l testamonech e lascèr che vae inant i joegn.

L liber é dedicà soraldut a la vita, la cultura e l saer fèr de la jent, ajache nosc ambient l é l frut del lurier fat ti secui per rencurèr l teritorie e se pissèr a fèr vèlch per poder soraviver e per l meter ensema i à desfrutà l’esperienza grafica e tipografica del ampezan e la cognoscenza del teritorie e de la persones che aea i doi coordenadores: Weiss per la pèrt ozidentala de la Dolomites, Constantini per chela orientala, da la man del Agordin a auta provinzia de Belun.

Ensema i ne à contà coche i à metù ensema chest liber con contribuc de zirca 60 autores e colugn che l é i argomenc de l tol dant e la marevees che i à descorì. 

Chisc libres, riches de informazion e curiositèdes, vegn venui da dezember te dut nosc raion, dac fora ence travers la Cassa Rurala Dolomiti olache i sozi podarà i aer a n priesc mender e jir a i tor ti ofizies APT che fèsc la distribuzion, e venui te la maor boteighes de libres de val.

Podede lejer la intervista su La Usc stampèda de vender ai 26 de november.   (Lucia Gross)