L’Azienda agricola Soreie a Vich da passa 10 egn porta inant con pascion l’endesfida de coltivèr sa mont per produjer magnères de calità, se fajan cognoscer e aprijièr. Da pech ti terens de la strutura l é stat fat na descorida enteressanta, che podessa la fèr doventèr protagonista ence per n’autra rejon: jan ju zirca 100 metres sot tera l é stat troà na fontèna de èga che podessa aer carateristiches termales.
L geologh Armando Chini col bachet da rabdomant l à verificà la prejenza de l’èga e l à conseà de fèr domana de enrescida de èghes minerèles a la Provinzia de Trent, che l à dat l’autorisazion.
Dai prumes resultac l é vegnù fora che la é n muie rica de minerèi e la descorida somea esser dalbon enteressanta vedù che ai 15 de dezember al agritur Soreie ruarà n grop de 5 geologs de la Provinzia de Trent per tor dant la costion e fèr sia valutazions.
De più su La Usc stampèda de vender ai 10 de dezember. (Cri.m)
|
|
