La Usc di Ladins

En martesc ai 5 de oril la comunanza de Soraga e de duta Fascia à compagnà te sie ultim viac la maestra Graziella Pellegrin, se n jita te la Pasc del Segnoredio ai 2 de oril del 2022.

La malatia se l’à portada demez de demò 71 egn, do na vita passada desche ensegnanta te le scole populare de Fascia. La maestra Graziella l’à ensegnà per 41 egn, de chisc 30 te la scola de Soraga.

Na vita te anter n grum de scolees che tant ge à volù ben e amò aldidanché la recorda desche na ensegnanta de gran cher e pascion che à portà inant so mestier desche na vera vocazion, na miscion, descheche l’à recordà ence Manuela Rossi, a inom de duc si scolees.

Graziella l é stat una de le prume maestre a ensegnar ladin te scola ensema a la maestra Rita Lorenz de Bora rechia. L’aea cognosciù ben don Massimiliano Mazzel canche la fajea le magistrali a Roveredo – le ne aea contà Graziella te n intervista su La Usc del 2010. »De domenia gio e Rita jiane al Beata Giovanna a registrar trasmiscion radio per ladin, don Mazzel ne dajeva da lejer. Del ’70, do mia pruma esperienza te le scole de Fontanac, don Mazzel ge à telefonà a mia mare a ge domanar se aesse volù jir a ensegnar ladin. L era na aventura, no se saeva che e co, l era i prumes egn de ensegnament de ladin te le scole.«

Del 2010 canche la maestra Graziella é jita en penscion, si scolees, l Comun de Soraga, la Scola Ladina, l’Union di Ladins e l Istitut ladin ge aea fat gran festa per la rengraziar per si tenc egn de ensegnament e per se aer dat ju col ladin ti egn senestres canche i ensegnanc e i genitores era de contra. Enlouta Graziella l’aea volù far n retrat recort con duc si scolees de Soraga per se i tegnir strenc tel cher. La lascia n bon recort te duc chenc, la lascia n gran vet.

De n muie i à volù tor part a la manconia e do la messa de sepoltura i l’à recordada con si pensieres. Ence l’Union di Ladins se strenc apede chi de ciasa e la recorda con gran recognoscenza. 

De più su La Usc stampèda de vender ai 8 de oril.  (MCI)