La Usc di Ladins

Na femena da Cianacei che col parapent se aea molà ju da Col Rodela l’à abù n azident e la é stata ricoverèda al ospedèl Santa Chiara de Trent con paches e ferides.

Pech inant mesdì l Socors da mont é stat chiamà do che al numer unich de la emergenzes 112 ge é ruà la segnalazion da man de na persona che aea vedù l azident. 

La ela de 56 egn à perdù l control per rejons amò da fèr fora, l’à tacà a jir en ju e la é ruèda contra i paralevines de Val Salei, a zirca 2.200 metres de auteza.

I socoridores de la Stazion del Socors Auta Fascia se à enjignà sobito, l tecnich de la Zentrèla del Socors col Coordenador de l’Area operativa de la Tèlia del Nord à chiamà l jolier che à fat ruèr tecnich e equipe sanitèra sul post, e dapò ence l operador del socors fascian che à didà te la manovres per recuperèr la ela ferida, che no l’à perdù cognoscenza. La femena da Cianacei é stata sobito stabilisèda e portèda co la binda sul jolier per vegnir portèda a Trent te ospedèl.  (LG)