La Usc di Ladins

Chesta setemana sion jic a troar l bacan Giuliano Decrestina Palua che à tout en gestion la malga Boer del Comun de Soraga sun Sèn Pelegrin.

Giuliano l tegn te stala 40 vace da lat, de bachegn da Fascia, da Fiem e ence da Ègort. El l é vizepresident di bachegn da Soraga e l fasc part del Consei de la Malga de Fascia.

L ne speta sun usc. L é l terzo an che l se tol a fit la malga, l secondo che l à avert l local per far da magnar, l prum an l era amò dut da far fora. 

Se senton ju a se far cater ciacole. No l é amò nesciugn che rodolea lo dintorn ence se l ne disc che foresć n é jà belebon e che soraldut ti fins de setemana i à n gran da far. L é cruzià per l pesonal, ge mencia n paster e ence na chelera. »Chest an a troar personal se fasc più fadia che a troar or« ne disc Giuliano. Endana i se rangia te familia, col didament de soa femena, de soa mare e de so pare, ma l é senester ge star do a dut. L spera de troar prest valgugn.

Chel de la mencianza de personal l é n problem belebon slarià fora, ence te val, l é adertura bar e restoranc che à cognù serar percheche no i à colaboradores assà.

De più su La Usc stampèda de vender prum de messèl.  (Monica Cigolla)