La Usc di Ladins

D’uton del 2019, al scomenz del an de scola, n grop de 6 studenc e ensegnanc da S. Ignacio de Mojos, te la Bolivia, era stac per 15 dis te Fascia per tor pèrt a n bel projet de cooperazion internazionèla che aea tout ite ence la scola de Fascia, en particolèr l Liceo artistich, e la comunanza de Poza e Pera travers la parochies de don Andrea e l grop miscionarie Freinademetz.

L projet de barat artistich era stat portà inant en colaborazion con Villa S. Ignazio de Trent col miscionarie gesuit trentin P. Fabio Garbari, da passa 35 egn te la Bolivia, e col sostegn finanzièl de la Provinzia de Trent. L obietif, per la comunanza amazonica de la Bolivia, l era chel de stravardèr l’identità culturala indigena mojena, da l’autra man per la Scola de Fascia, enlouta sot la vida de la Sorastanta Mirella Florian, l era na bela ocajion de confront anter desvaliva cultures, per trasmeter e smaorèr la competenzes artistiches e la crescimonia personala, soziala e culturala di studenc.

L projet aea regnèda 3 egn e, seben che mingol condizionà dal Covid, ades l é ruà a compiment con suzes. I ejic é stac prejenté l meis passà a Villa Sant’Ignazio a Trent, te na scontrèda a chela che P. Garbari à tout pèrt online da la Bolivia.

De più su La Usc stampèda de vender prum de messèl.  (Lucia Gross)