La Usc di Ladins

Dut l é endò vertech a Poza per na neva edizion de la Festa ta Mont. Do 2 egn segné da mudamenc, limitazion e ence desfortuna, l Comitat de endrez vel pear endò via con sbunf e gaissa, de gra al bel grop de joegn che à tout te man le redene l an passà, vidà da Melissa Locatin. 

Con la neva presidenta aon rejonà de programes, valores e del argoment cernù chest an: la comunanza.

Melissa, col nef grop de joegn no aede cernù l moment mior per ciapar te man le redene de la Festa ta Mont. Co éla stata?

Melissa Locatin Noi sion rué ite del 2020, l veie Comitat che endrezaa la festa dal 2008 l aea perdù mingol gaissa e energie, l ceria forze neve e aon dat la desponibilità. Chel l é stat l an più senester per via del Covid. Aane fat demò la domenia, con na sort de cestins de roba da magnar che la jent podea se tor e atività ta mont che ogneun podea far con soa familia, per no far assembramenc. Da doman la era jita, ma domesdì l aea pievet. L an passà aon fat l nef Comitat e son doventada presidenta. Aane endrezà semper demò la domenia percheche l era amò protocoi e limitazion, ma l é stat ‘allerta meteo’ e aon cognù descancelar dut, per no spener scioldi a comprar roba che fossa restada aló o adertura risiar de meter jent tel pericol, perché col Giaf l é da star ascorc.

Chest per noi l é l prum an zenza massa limitazion, ence se vardon semper de star ascorc: se fossa coude ge domanaron a la jent de meter su l couribocia, ma l endrez cognessa esser mingol più sorì.

Chi él te chest nef Comitat?

Noi sion partii de 5 o 6 e sion cresciui col temp. No sion n grop de amisc che se troaa tras stroz, aon enteresc e competenze desferente e fosc a la fin chesta varietà l é n pont de forza. Ades l é ite Elisa Calligari, Luciano Calligari, Francesco Detomas, Giacomo Bernard, Alessia Costazza, Nicolò Dorich, Damiano Lorenz, Emily Rasom, Stefano Rasom e Fulvio Romano. 

L é la seconda festa che endrezon noi joegn, ma cogne dir che aon semper n gran aiut da chi del Comitat da dant: Giancarlo Cavei, Edy Bocol, Tullio Malgher, Roberto Bertacco e autres… De spes te le sociazion i disc: »fajé voi che ve didon ben« ma resta demò parole, enveze noi aon n aiut fondamental. Noi jon miec con la tecnologia, ma te la pratica no saon nience da olà scomenzar a tor ju mesure o enjignar bree per i stonc e le paladine… guai se chi del veie Comitat no i ne didassa!

Podede lejer duta l'intervista su La Usc stampèda de vender ai 22 de messèl.  (Lucia Gross)