La Usc di Ladins

Se à serà su con trei seres de reflescion fona, dedichèdes a temes e persones de gran spessor, »Ispirazions d’istà« 2022, la rassegna culturèla ruèda a la 13^ edizion, metuda a jir da la Comiscion cultura de la parochies de Fascia col sostegn de Diozesa de Trent, APT de val e Comitac manifestazions. Na rassegna che, de gra al empegn di componenc de la Comiscion, coordenèda dal professor Cesare Bernard, se à metù al luster fin dal scomenz per la calità de sia proponetes, che tol ca temes emportanc e vèlch outa descomec, envian duc tel temp de vacanza, o de gran lurier per la jent del post, a se tor fora n moment per pissèr e magari ence a mudèr l biot pensier te azions concretes.

Ai 17 de aost tel teater de Navalge a Moena l é stat recordà con testimonianzes desvalives Papa Jan Paul I, che l à stat a cef de la gejia per pech più che n meis, ma l é restà tel cher de duc per sie esser umol e tel medemo temp revoluzionarie e che chesta domenia ai 4 de setember l é stat proclamà beat.

La gejia de Pera é stata enveze teater ai 23 de aost de la scontrèda col Custode de tera Sènta p. Francesco Patton, trentin del Orden di frati minori de Sèn Francesch, nominà del 2016 Custode de Tera Sènta e confermà chest an te la encèria prestigiousa e delicata a cef de la Custodia.

En ultima te la Pieif de Sèn Jan ai 24 de aost Elisa Salvi ge à dat l benvegnù al più joen cardinal del mond, Dieudonné Nzapalainga, da Bangui te la Republica Centrafricana, nominà cardinal de 49 egn del 2016 da Papa Francesch, che l an dant l aea dezidù de orir l An Sènt a Bangui.

De più su La Usc stampèda de vender ai 2 de setember.


 (Lucia Gross)