»Chest an la é jita n muie ben, eraane de 135 respet ai 120 del an passà. L é stat mingol più senester tacar via ajache cognaane se endrezar con numeres più auc, ma dapò la é jita dalbon ben.«
Vanessa Tomasi, responsabola de Istagran, l projet de animazion che tol ite i bec dai 7 ai 12 egn del zenter Fascia, endrezà da la Coprativa soziala INOUT col sostegn di Comuns, é contenta de coche l é jit chest istà.
Ence chest an n bel grum de bec e bezes à podù se passar doi meisc dalbon piegn de atività vidé e compagné da 18 animatores: Angelica, Rachele, Stefania, Evelin, Rebecca, Sofia, Francesca, Mattia, Melany, Linda, Daniele, Luana, Tania, Sabrina, Luca, Gloria, Lara e Vanessa.
I é jic te nodadoa, coi feres, doi oute en setemana sa mont, i se à sproà con la cojina, i à endò podù far art marziale desche Yoseikan Budo. Chest an amò apede l é stat endrezà na bela colaborazion con la sociazion ASD Moena Sport Ginnastica e la presidenta Valeria Voltanella e coscita i à podù jir ence te la palestra atrezada fora Stava olache i à fat artistica e acrobatica ritmica e chest l é stat aprijià ence dai bec masći ajache vegnia fat ejercizies con rees e tapees.
»Desche tem chest’outa aon cernù l’Agenda 2030 - à spiegà Vanessa - donca aon fat n muie de scomenzadive leade al respet del ambient e a le energie renovabole.«
De più su La Usc stampèda de vender ai 9 de setember.
(Monica Cigolla)
Con Istagran, atenzion e respet per l ambient
135 bec e bezes à tout part a le atività endrezade dal grop de animatores vidé da Vanessa Tomasi.
Galaria retrac
View the embedded image gallery online at:
https://www.lausc.it/valedes-ladines/fascia/20906-con-istagran-atenzion-e-respet-per-l-ambient#sigProId8a47168b21
https://www.lausc.it/valedes-ladines/fascia/20906-con-istagran-atenzion-e-respet-per-l-ambient#sigProId8a47168b21