La Usc di Ladins

La sajon da d’istà la é jita a piz e beleche duc i impianc portamont à serà, i ultimes en domenia passèda ai 25 de setember. Resta amò averta la forenadoa de Ciampedie enscin ai 9 de otober e chela de Sas Pordoi fin al prum de november, ai 15 de otober l é la 22^ edizion de Top Wine.

L impiant portamont de Bufaure l verjarà endodanef en via ecezionèla al prum e ai 2 de otober per na ocajion de sport e de devertiment per noscia comunanza: do cater egn che no la vegnia più fata en domenia ai 2 de otober vegn endò endrezà la Vertical Bufaure, la garejèda de corsa che fèsc pèrt del program de vertical de Fascia e Fiem 2022. De gra a la colaborazion anter la Coprativa sozièla Inout, la sozietà Bufaure, l Comun de Sèn Jan e l Comitat Manifestazions de Poza, sarà na festa per serèr su la sajon da d’istà. Defat sun Bufaure vegnarà endrezà na garejèda più sorida per i più picoi e i joegn feruscoi de Inout portarà dant jeghes, endesfides de noscia tradizion e tornoes. Per chesta ocajion se pel jir su e ju con l impiant al cost demò de 10 euro.

De più sul bilanz del istà per la sociazion su La Usc stampèda de vender ai 30 de setember.  (Monica Cigolla)