La Usc di Ladins

Tel maraveous cianton de la frazion del Vera, tedant al imponent crep del Vernel, i recorc, i pensieres e l cher é jic enstadì deretorn tel temp, a ge dèr ousc e memoria a na femena simbol e testamonech de la storia de Fascia, Lis dal Vera. 

En domenia ai 9 de otober la Majon di Fascegn à endrezà la raprejentazion »Do l vièl del saer – Lis dal Vera vel te dir vèlch« dedichèda belapontin a chesta femena che à passà duta sia vita sal Vera e l’à vedù l mudament de paijes, de lurieres, de jent.
L’idea de meter a jir vigni an sun paladina la storia de n personaje de Fascia la é nasciuda l an passà aldò del bon ejit del spetacol dedicà a Père Frumenzio Ghetta de Martin. Chest’outa la Majon di Fascegn à volù tor ca na femena, n simbol de duta la femenes da zacan, ejempie de fadies e de struscies. 
Ilaria Chiocchetti à scrit l test con gran profescionalità e pascion, se didan con la registrazions toutes su jai egn da Cesare Poppi e l video de Renato Morelli ‘Le stagioni di Lis’, e i recorc de la fies. Ela ge à dat ousc e interpretazion a Lis e l’à metù dant tassie de sia vita da femena protagonista del mudament de la val: i egn de la vera, la struscies del lurier te pra e te ciamp, portèr tera, meter caeria, seslèr, frelèr, jir co la vaces, portèr l fegn da mont, dut lurieres che fajea la femenes ajache i omegn era demez al Lont a se l vadagnèr. L’à contà ence de coche l’à tirà su sie fies, de coche soraldut la doi jomelines l’à fata tribolèr… L contèr se à dejout tedant la picola gejiola e dapò dant tobià col didament di atores de la compagnia ‘Trei carc de ora’: David Dorich, Ivano Favè e Letizia Pezzei col suport de Paola Costa e la tecnica audio de Marco Mattia.

De pù su La Usc stampèda de vender ai 14 de otober.   (Monica Cigolla)