La Usc di Ladins

L à rendenì fort e adaut l detelpai che la comunanza fasciana ge à sport en domenia ai 26 de marz a sie preve don Erminio Vanzetta. Detelpai per i 65 egn de sacerdozie e i augures per l bel travert di 90 egn, compii ai 29 de marz.

»I preves l é n don del Segnoredio per nosce comunità, ma se cogn se i meritar e no i dar per segures. No sé se cheste comunità te à merità don Erminio, ma tu es segur nosc don del Segnoredio« ge à dit te la Pieif l ombolt de Sèn Jan Giulio Florian.

Na Pieif piena de fidei, de le parochie de Soraga, Vich, Poza, Pera e Mazin ma ence de chi rué più da dalonc, dal Primier e con le parole ence da Bondone e Baitoni, lesc olache don Erminio l é stat decan e paroch, ensema a si parenc vegnui per l strenjer te n fort braciacol.

Dantfora sun sagrà de gejia se à binà le Museghe de Poza e Vich, raprejentanc di Schützen e del Socors de Fascia e de Primier, di Studafech, di Alpins, del Grop de Folclor de Soraga, le autorità zivile e melitare, l piovan don Andrea Malfatti, l diacon Antonio Ghetta, n bel schiap de servidores da dute cante le parochie de la Val de sot e la jent, duc per compagnar don Erminio fin te gejia olache el à ofizià messa grana ciantada a festa dai Cores ensema.

De più con de desvalives retrac su La Usc stampèda de vender ai 31 de mèrz.  (Monica Cigolla)