La Usc di Ladins

Enceben che l temp no sie stat proprio di miores, en domenia ai 16 de oril l piaz de Comun de Sèn Jan se à viventà con na bela festa olache i bec à podù se goder de gra a Bambi, che no se ferma dedant a nia, e a Circensema, che la se met semper a la leta bolintiera per jir a ge dèr na man e che à sciudà l ambient e l cher di partezipanc.

L event é stat dedicà al »Projet Fiore«, per didèr la familia de Federico, n bez da Fiem che à n problem grief e che domana ence n muie de speises. 

L é stat na bela ocajion per envièr genitores e fies a passèr vèlch ora ensema, per se cognoscer e per cognoscer Bambi e sia atività.

Na atività che a Sèn Jan vegn portèda inant da 18 volontadives da Pera, Vich e Poza, n bel grop olache dutes, ogneuna con sia carateristiches e desferenzes, é leèdes dal obietif comun e dal gran estro de fèr e de didèr, e apontin da la desvalivanza vegn n valor de più.

De più su La Usc stampèda de vender ai 28 de oril.  (Lucia Gross)