La Usc di Ladins

La sozietà Fassa Terme à sotescrit ai 20 de oril passé l at notaril per comprèr l 3% de la quotes de la sozietà de impianc portamont Ciadenac, 122.000 quotes per n valor de 550.342 euro. La doventa coscita l terzo sozio de la sozietà de impianc portamont, ensema a la SITC che à comprà l auter 4% del total del 7% de quotes che l Comun de Sèn Jan à metù sul marcià. Chesta operazion é stata fata percheche do la fujion di doi Comuns de Poza e Vich, l Comun de Sèn Jan é ruà a aer na partezipazion al 32% de la quotes de la Ciadenac e chest comportèa che la sozietà no posse più aer azes a nesciun contribut provinzièl. La vendita de la quotes da man del Comun de Sèn Jan l é stat donca na operazion oblighèda.

»L é n investiment che aon volù far percheche Fassa Terme vel esser protagonista del svilup de la val – à dit l president Claudio Bernard a la radunanza di sozi stata ai 29 de oril – e percheche la sozietà Ciadenac l à per strada projec emportanc.

Sion stolc de aer portà a compiment, ensema a la SITC che à desmostrà gran sensibilità e vijion, chest varech che moscia la volontà de se didar fora anter sozietà. Ensema a la Ciadenac podon pissar a la creazion de oferte turistiche col sporjer pachec ence tel temp de fora sajon« – à dit amò l president Bernard.

De più su la radunanza de la sozietà Fassa Terme su La Usc de en vender ai 5 de mé.  (Monica Cigolla)