La Usc di Ladins

“Na azion scempia per l grignot de n bez” l é l titol de na sera endrezèda dal Comitat de Fascia e Fiem de la Crousc Checena per la prevenzion di azidenc di bec.

En vender ai 5 de mé da les 20:30 te sala del Consei de Comun a Sèn Jan esperc socoridores podarà ge moscèr a duc coche se à da entervegnir te situazions de emergenza. 

La scontrèda la é debant e duta la comunanza é envièda a tor pèrt, en particolèr genitores, educatores, ensegnanc e chi che à a che fèr con bec. Per aer maor informazions se pel manèr na mail a msp@critrentino.it

La Comitat CRI de Fascia e Fiem sarà dapò atif ence en domenia, en vea de la Dì internazionèla de la Crousc e de la Mesa Luna Checena, che chest an la é ai 8 de mé e chest an la sarà donca de lunesc. 

En domenia ai 7 de mé i volontadives de Fascia e Fiem i sarà dut l dì te Piaz di Sènc Felip e Giacom a Pardac per testimonièr l empegn che vegn portà inant te dut l mond da 14 milions de volontadives, e de chisc 150 mile te la Tèlia e ben 270 te noscia valèdes.

Te chesta giornèda duc podarà vardèr na abulanza e coche la vegn atrezèda, i podarà veder na postazion medica arvanzèda, emparèr manovres che pel salvèr na vita, se fèr mesurèr la prescion e amò cognoscer la campagna de comunicazion, i intervenc de protezion zivila e i projec sozièi del Comitat de la doi valèdes de la Veisc, ence chi più lijieres e gustegoi per i più picoi.  (LG)