Sèn Florian festejà dal paisc de Cianacei

Data

05 de mei 2023

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
La Frazion col didament de la Mèscres à endrezà n tendon per la sègra. En domenia l jurament de trei neves studafech e la consegna de doi benemerenzes.


Sèn Florian, patron de Cianacei e di Studafech, l vegn onorà ogne an ai 4 de mé. Per la pruma outa chest an l é stat festejà dantfora con trei dis de festa te tendon de Pian de Parèda. Col didament del Grop de la Mèscres de Cianacei e Gries, la Frazion de Cianacei la ge à sport a jent del paisc, fascegn e ghesć trei dis de bona speisa e musega. L fin de setemèna l é peà via jà en vender col duo fascian VolxAlp e la festa la é jita inant ence la dì do per dutoldì con da sera la musega di Pazedins.

En domenia ai 30 de oril la dì de sègra é peèda via da doman con la messa grana da mesa les unesc dita da don Mario Bravin te piazal del International, apedejù la picola gejia dedichèda al sènt patron. Dant da la funzion l capofrazion Rinaldo Debertol à volù recordèr i compaejegn che no é più co nos e l ge à dit n fort detelpai a don Mario e a duc chi che se à dat ju per l endrez garatà de la sègra.

Endèna la perdicia, a peèr via dal Vangele, don Mario à recordà Gejù desche n bon pèster che, con coraje e zenza pertener nia de retorn, l defen sia feides. Coscita ence Sèn Florian, canche entorn l 300 d. C. l é n princeps de l’armèda romana: cò l é tedant n paisc descognosciù e nemich che bruja, l endreza si omegn per destudèr e salvèr la cèses. »N studafech ante litteram, podon l conscidrèr - à dit don Mario, che l é ence volontèr atif del Corp de Cianacei e vizeispetor de Fascia - per chesta rejon l é recognosciù ence desche patron di studafech«. 

De più su La Usc stampèda de vender ai 5 de mé  (Nicoletta Riz)