La Usc di Ladins

L conzert d’aisciuda l é un di momenc più emportanc e speté da la bandes de noscia val: l é l moment per ge portèr dant a la comunanza n nef conzert, con toc e cianties de alegria e emozion. Do chel de la Banda de Moena, ence la Musega Auta Fascia à portà dant sie Conzert en sabeda passèda te chino de Cianacei.

La sera é stata averta per engaissèr ite l publich con na marcia todescia, dal titol ‘Ferienfahrt’. Dapodò con la moderazion de Franz Mazzel compagnà da la Marchetenderes, la Musega, reta dal maester Paolo Rasom, à fat viajèr i spetadores anter cianties rock e pop storics, polkes e marces da conzert, toc cianté per ingleis e per talian.

L é stat sonà ‘Where eagles soar’ de Steven Reineke, ‘olache se libra la ègues’: n toch dassen da emozion che ge à fat da colona sonora a n filmat de paesajes da encant de noscia Dolomites, a na ègua che sgola sora la crepes de cèsa e dapodò i Queen, con n medley che à tout ite si maores suzesc.
Ma fosc l moment più da emozion l é stat la ciantia ‘Hallelujah’: toch viventà da la ousc frescia e joena de Sara Bernard compagnèda da la Musega. 
Ades n auter apuntament é per doman, sabeda ai 6 de mé da les 16:00 semper te chino Marmolèda, co la prejentazion de na neva ciantia. Tel chèder de l’Aisciuda Ladina, la Musega Auta Fascia prejenta “Na cianzon per la Val de Fascia”, musega de Silvia Leonetti e paroles de Mariano Lollo.

De più su La Usc stampèda de vender ai 5 de mé.  (Nicoletta Riz)