La Usc di Ladins

En domenia l piaz dedant al Comun e la gejia de Pardac se à empienì de bandieres con la crousc checena. En vea de la Dì internazionèla de la Crousc e de la Mesa Luna Checena, che chest an l é stat en lunesc ai 8 de mé, i volontadives del Comitat CRI de Fascia e Fiem à metù fora sia postazions a Pardac per testimonièr l empegn che vegn portà inant te dut l mond da 14 milions de volontadives, e de chisc 150 mile te la Tèlia e ben 270 te noscia valèdes.
L era l cianton con la ativitèdes per i più picoi, l’ambulanza atrezèda e la postazion medica avanzèda, la scomenzadives de solidarietà e auter.
Te la tenda di intervenc umanitères vegnia moscià travers filmac e testimonianzes la situazion dramatica che la Crousc Checena e en generèl i operatores sanitères é do a viver te chest temp, te dut l mond ma ence te la Tèlia. 

De più su La Usc stampèda de vender ai 12 de mé.  (Lucia Gross)