La Usc di Ladins

N an la va ben e n an manco e se fèsc sobito a serèr su n bilanz en ros. Les lo sà ben la sozietèdes de impianc portamont che cogn fèr i conc ogne sajon con desvaliva variaboles: l temp, la neif, l vent, i cosć del eletrich e te chisc ultimes trei egn ence na pandemia. A pesèr sul bilanz de ejercizie serà su ai 31 de dezember del 2022 de la sozietà Bufaure l é stat la couda de na magagna che à lascià segnes te ogne setor. Se l bilanz del 2021 moscèa n utol de 170 mile euro, chest de gra ai restores per l Covid (e del 2020 n utol de 20 mile euro), chel del an passà moscia n desavanz de 247.419 euro.   

Somea cert a pissèr al bon ejit de la sajon da d’invern tanche passèda ma se cogn fèr cont che l bilanz tol ite i meisc da jené a oril del 2022 canche l era amò en esser la restrizions. L é stat chesta una de la rejons uzèdes fora dal president Christian Lorenz a la radunanza de la sozietà stata en mercol ai 3 de mé te sala de Consei de Comun de Sèn Jan. 

De più su La Usc stampèda de vender ai 12 de mé.  (Monica Cigolla)