No aessa podù esser na produzion più trefèda per confermèr l spirit de chesta Aisciuda Ladina, del valor del baratament e del mescedament de identità che »Na cianzon per la Val de Fascia«, prejentèda en sabeda ai 6 de mé te Chino Marmolèda a Cianacei per serèr su la setemèna de scomenzadives de chesta edizion.
L domesdì, coordenà e prejentà da Loreta Florian, se à avert con la letura da man de sia coleghes del Ofize linguistich de 4 toc touc fora e traslaté da n liber de Stefen Monech che met dant l’idea del autor sul tem de l’identità ladina. Dapò l é ruà l moment più spetà, chel de la musega. Dut l publich aea gaissa de sentir la neva ciantia che era stata anunzièda.
»Na cianzon per la Val de Fascia« é nasciuda da na idea del Maester de la Musega Auta Fascia Paolo Rasom de Gotart da Vich, che l à pissà de valorisèr i talenc che l aea a la leta: la gaissa de scriver de Mariano Lollo, la braura de la componista Silvia Leonetti e la ousc de Noemi Iori, apede se sà ben a la desponibilità di strumentisć de sia Musega. Duc adum i à sport la tesseres che à permetù de meter adum n mosaich prezious, che do n an e mez de lurier é stat portà dant per la pruma outa assoluta su la paladina de Cianacei, olache a compagnèr Noemi Iori l era la ciantarines de »Cianton da marevea«.
»Na cianzon per la Val de Fascia« é stata portèda dant te sia verscion originèla ence te n bel video, olache ensema con Noemi cianta i bec del Cor de ousc biences de la Scola de Musega Il Pentagramma, vidà dal maester Ilario Defrancesco. Se pel l veder sun youtube.
De più su La Usc stampèda de vender ai 12 de mé. (Lucia Gross)
Na cianzon per la Val de Fascia
A Cianacei l é stat prejentà la neva produzion con test ladin de n ‘ciociaro’ enciasà chiò, musega de na fascèna con reijes da la Puglia che stèsc a Roma e ousc de na ladina tramudèda te la Lombardia.
Galaria retrac
View the embedded image gallery online at:
https://www.lausc.it/valedes-ladines/fascia/23627-na-cianzon-per-la-val-de-fascia#sigProId90dd6178e1
https://www.lausc.it/valedes-ladines/fascia/23627-na-cianzon-per-la-val-de-fascia#sigProId90dd6178e1