La Usc di Ladins

»Ve aane emprometù de ve tegnir informé de chel che fajon«. Con chesta paroles l ombolt Giovanni Bernard à avert la scontrèda de mesa legislatura en jebia ai 25 de mé te sala del Consei de Comun de Cianacei, per ge prejentèr ai sentadins i lurieres fac e chi en program e tor su osservazions e proponetes.

L prum intervent recordà dal ombolt l é stat la circonvalazion de Ciampedel e Cianacei: na opera da 130 milions de euro, che endèna l é na emprometuda de la Provinzia, ma de bon l é che i doi comuns à troà na cordanza, ajache tel passà chesta opera se à ferà percheche no i era a una.

L secondo argoment metù dant l é stat chel de la Marmolèda. Do aer recordà la conferma del confin su la cresta, Bernard à fat a saer che va inant l lurier per l svilup de atività tel setor scientifich e geologich, e per chest chisc dis passé l é stat na scontrèda col MUSE. Dapò l ombolt à dit che fazile ence chest istà la pèrt auta da Pian di Fiacons la cognarà vegnir serèda, ampò se vardarà de tegnir avert l azes per ruèr sun Ponta Penia da percorsc alternatives e de no dèr la faussa informazion che »la Marmolèda é serèda« per no penalisèr i operatores.

De più su La Usc stampèda de en jebia prum de jugn.  (Lucia Gross)