La Usc di Ladins

»Esser spezièi vel dir esser bogn de fèr entener che tie pont debol doventa chel che te fèsc esser più stolza«. L é chest l conzet, palesà per talian da la sportiva de nonzech Bebe Vio, che Giusy Furlanetto à cernù per fèr entener la filosofia che caraterisea l »Sportensema Day«.

Organisadora de evenc e da 6 egn responsabola del zenter Fiabilandia sun Pra de Sort a Moena, Giusy Furlanetto met a jir vigni istà scomenzadives avertes a duc. L an passà l apuntament era stata leà al cedean del Corp di Alpins, col titol »150 egn en vera e en pèsc«, e amò chest an sun Contrin l é stat endrezà l event »Viver la mont« con l Eserzit, metù a jir con suzes ai 11 de messèl e endò en program per i 8 de aost.

L »Sportensema Day«, sul calandèr en vender ai 21 de messèl, l é n event dassen spezièl, apontin percheche l se ouc a duc e soraldut a chi che, per na rejon o per l’autra, i se sent o i vegn conscidré spezièi. Avert a duc, l sporc dut l dì ativitèdes de sport e jech te n clima de spas, amicizia e inclujion a bec e joenec dai 3 ai 16 egn. L vegn metù a jir de gra a la colaborazion con la Sociazion Sportabili de Pardac, col Comun de Moena e con la Coprativa Sozietà svilup turistich Moena e Sèn Pelegrin e col didament del Eserzit, de la Crousc Checena e del grop di adestratores de cians e l sostegn de l’APT de Fasdcia e de la Cassa Rurala.

L event pea via da les 10 da doman al zenter Navalge olache do l azet, i saluc e la prejentazions vegnarà metù ensema squadres mescedèdes de bec e joenec con abilitèdes desferentes che podarà se sproèr te ativitèdes desche tennis, balon, roda, roller, basket e c.i. Anterite sarà la desmostrazion di arcedadores de cians e da les 12:30 duc se tramudarà al parch Fiabilandia, olache vegnarà enjignà da magnèr. Do marena vegnarà fat ativitèdes curiouses su la prevenzion ensema con l Eserzit e con la Crousc Checena. Entorn mesa les 5 sarà la premiazions a la prejenza de campions del sport e dut se serarà su da les 6 da sera.

L zil de chesta giornèda l é chel de portèr dant l sport desche strument per fèr crescer la consaputa e la fiduzia de ogneun te sia possibilitèdes e de sensibilisèr la jent sul valor de l’inclujion, fèr pissèr al stravardament di deric de la persones che à vèlch dificoltà e a l’emportanza de les respetèr dutes, ogneuna con sia desferenzes e si tempes.

Per tor pèrt a l’ativitèdes l é da chiamèr l numer 353 3575534 da les 9 da doman fin les 6 domesdì. Se ai 21 fossa burt temp l Sportensema Day vegnarà sburlà a en vender ai 28 de messèl.  (LG)