La Usc di Ladins

L era l an 1993 canche l joen musizist Ilario Defrancesco da Moena à pissà de meter su na neva formazion de ciantores, su la pedies de la Corala Bruckner che oramai da vèlch an aea serà su sia atività. L à binà ensema coscita i prumes ciantores, tant ic che eles, da Moena ma ence da etres paijes de Fiem e Fascia, e l ge à metù inom »Ensemble Canticum Novum«, ajache chel che l volea portèr dant l era n stil nef, no chel de la cianties da mont e nience demò sacral o demò folclorich, ma vardan de tor ispirazion da dut chel che podea didèr a crescer e portèr dant vèlch de desferent e particolèr.
Chest an, la proponeta del maester Ilario Defrancesco per l 30° cedean renovea endò la colaborazion e la fradaa con Gherdena e con l maester Claudio Kerschbaumer, che vida l Cor de gejia de Laion.

L Ensemble Canticum Novum à dezidù donca de festejèr chest travert zis emportant adum col Cor de Laion e con chel Roncadic, vidà dal maester Friedemann Ploner, compagné da na orchestra metuda adum beleche deldut da musizisć de Gherdena. Per chest l é stat endrezà trei bie conzerc che sporc composizions classiches e contemporanes.
L organich é componù da presciapech 80 corisć, 4 solisć e passa 20 musizisć, la pruma esecuzion é en program en vender ai 25 de aost da les 9 da sera te gejia de Sèn Vile a Moena; dapò duc se tramudarà a Laion, olache ai 26 de aost da les 8 da sera te la gejia parochiala l é pervedù la seconda esecuzion. L ultim conzert sarà ai 3 de setember te gejia de Selva da les 6 da sera.

De più su La Usc stampèda de vender ai 25 de aost.  (Lucia Gross)