La Usc di Ladins

No l é sorì contèr l gordeon de emozions che à vivù i sonadores de la Musega de Poza en sabeda ai 16 de setember, canche per festejèr i 90 egn de sia Banda i é jic a sonèr sunsom la Torns del Vaiolet. L’emozion per l’aventura, per zachei la pruma e magari la soula outa te la vita, de stèr sunsom n spiz e se sentir duc un a rampeèr, sonèr, fèr sgolèr la bandiera ladina, fèr grop e fèr festa.

No l é sorì render con la paroles la marevea, l spetacol, l ardiment de l’esperienza vivuda da 26 sonadores, vidé da 13 menacrepes, e ence da si amisc che li à compagné, vardé, engaissé e speté al refuge per i strenjer en ultima te n gran braciacol. 

Duc é stac protagonisć de chesta impresa straordenèra, che la Musega de Poza à volù fèr endodanef do 20 egn, ma un mingol più protagonist che i etres: Yanez Deluca, ajache zenza el chesta aventura maraveousa fosc no aessa podù se concretisèr, ne jai 20 egn ne ades. 

Yanez l à rampeà n muie e l é stat ence tel socors da mont, l é stat el a se cruzièr de duta la pèrt ‘alpinistica’: na gran responsabilità, perché endrezèr na banda de sonadores, zachei che no à mai rampeà, a jir fin colassù con strumenc e mondures no l é n sgherz, pel esser ence pericol. Del 2003, canche dal cef del Maester Cavei l era sutà fora chesta idea feruscola, l era jit dut ben, ma enlouta Yanez l aea demò 27 egn, da chela età se ciapa dut mingol più a la lijiera, ades l n à 47, l é n père de familia, e chest fèsc esser più prudenc, vardan de se endrezèr al miec per ge fèr front ence a vèlch picola dificoltà stata enlouta.

Tel articol su La Usc stampèda di 22 de setember l compagna te chesta aventura ence i letores de La Usc.    (Lucia Gross)