La Usc di Ladins

Del liber »Letres da Larcioné. Amadio Calligari a Tita Cassan (1887-1897)« l é jà stat scrit tel ultim temp su La Usc. La publicazion de Fabio Chiocchetti aur la coltrines sun n mond de persones, conties e paroles fascènes de la fin del ’800 che ne sporc informazions e curiositèdes teis, se demò che se à voa de les descorir. Bèsta vardèr la rubrica che l medemo autor ne met dant sun chest sfoi e che chesta setemèna troon belapontin chiò apede. 

Chest tant i lo à entenù ence chi che à tout pèrt a la prejentazion de chest liber, dat fora en coedizion dal Istitut Cultural Ladin e da l’Union di Ladins de Fascia, metuda a jir te la sala grana de la Majon di Fascegn a Sèn Jan ai 8 de setember, coi intervenc di professores Mario Infelise e Ulrike Kindl e ben segur del autor.

La giornalista Monica Cigolla, ela enstessa da Larcioné desche l Calligari, l’à prejentà i relatores e la ge à dat la parola dantfora a la presidenta del ICL Lara Battisti e al president de l’Union Fernando Brunel, che i à rejonà del valor de chest studie, che deida a ressolver ence l mister sul autor de la letres, e rengrazià Chiocchetti per sie gran lurier.

De più su La Usc stampèda de vender ai 22 de setember.  (Lucia Gross)