La Usc di Ladins

L é na strutura de ezelenza, chela che é stata averta tel »Ricreatorio« de Moena. N é 3 o 4 en dut tel Trentin e Anffas à abù l met de n endrezèr una ence per la valèdes de Fiem e Fascia, col contribut de la Fondazion Caritro. De gra al enteressament del Comun General de Fascia, con la Conseiera de procura al sozièl Mirella Florian, chesta »Ciasa de armonia« é stata loghèda apontin sul tegnir del CGF, avisa tel oratorie de Moena, olache don Gianni Damolin à metù a la leta l local che dapò l é stat atrezà. Duc i elemenc e i strumenc é stac pissé e enjigné metan adum competenzes tecniches, psicologiches e sanitères, per creèr na cambra multisensorièla interativa che à de gran potenzialitèdes per l benstèr de persones con problemes desvalives, per jent de età, ma che pel esser de utol ence per la didatica.

Duta chesta potenzialitèdes é states prejentèdes da pech da man de Anffas a referenc e operadores di Servijes sozièi del CGF e de autra sociazions che à sostegnù l projet, desche Bambi, Rencureme e l Laboratorie Sozièl, col didament fondamentèl de Elena Zanon, che l é la tecnica che cognosc e sà durèr delvers duc i strumenc che l é te chesta strutura.

De più su La Usc stampèda de vender ai 20 de otober.  (Lucia Gross)