La Usc di Ladins

L é ora de la Festa de Rengraziament de l’Union di Ladins de Fascia che chest an é stata metuda a calandèr mingol più inant che l solit. La sociazion culturèla envia duc en sabeda ai 28 e en domenia ai 29 a Cianacei per doi momenc de valuta. 

En sabeda ai 28 de otober se pea via da les 4 domesdì te chino Marmolèda de Cianacei con n conzert gustegol de orghegn da mantesc col grop de nonzech de musizisć furlegn e slovens »4Bellows 4Tales«. L conzert é debant e sobito do sarà n curt moment de radunanza per portèr dant l bilanz e l program de ativitèdes per l an 2024. I sozi é envié a tor pèrt per l aproazion del bilanz e per portèr dant sia idees e proponetes. A la fin sarà per duc n picol aperitif.

L moment ofizièl de la Festa del Rengraziament l é en domenia ai 29 de otober. La festa taca ite da les 10 con la messa ladina ofizièda te gejia del Sacro Cher de Cianacei da don Mario Bravin e compagnèda dal Cor de gejia. Sobito do se jirà en defilèda compagné da la Musega Auta Fascia e i gropes de folclor fin lo da Cèsa de Comun olache vegnarà recordà Ezio Anesi, prum conseier provinzièl e senator ladin de Fascia, ma ence ombolt de Cianacei, diretor de l’Apt e trop de auter. Ezio Anesi l é mort ai 9 de november del 1993, a 30 egn da sia mort l’Union di Ladins de Fascia vel l recordèr desche persona che se à dat ju trop te la comunanza te desvalives setores. Sarà n moment de recordanza ensema a sia familia e chi che l à cognosciù.

Te chesta ocajion se pel fèr o renovèr l'adejion a l'Unnion di Ladins de Fascia, ence en prospetiva de la litazions per l renovament del Consei, che vegnarà endrezères ai prumes de dezember.