La Usc di Ladins

Tel cader de le scomenzadive volude dal Grop Ladin da Moena per i 60 egn de soa fondazion, l é stat metù fora te la sala Valentino Rovisi te Comun de Moena na esposizion de cadres e sculture de l’artista Veronica Zanoner del Tinoto Gabana.

L’esposizion che à inom ‘Raìsh/Radici’ met dant le opere che va dai egn ’70 enscin ai prumes egn del 2000, la maor part di cadres à desché tem i monc de ciasa ma podon troar ence sogec astrac che somea vegnui fora dai ensomesc de l’artista.

I cadres e le sculture de ‘Vera’, descheche se scrivea Veronica Zanoner sun soe opere, recorda l cubism primitif, olache l soget vegn proponet da desvalives ponc de veduda, i volumes se mesceida un tel auter te n ambient che somea se dessatar, i colores duré da l’artista i é piac, i deida a renforzar le forme geometriche e a crear na composizion piata e scempia per uzar su l valor del contegnù più che chel de la parbuda.

Veronica Zanoner del Gabana é nasciuda a Moena te na familia de pitores, musizisć e poec ma sie percors artistich se à smaorà a Busan olache l’à stat dai egn 50 enscin a sia mort, stata de aost del 2022, de beleche 100 egn.

La mostra é averta fin sabeda ai 11 de november, anché e doman da le 16 a le 19 e sabeda ence da le 10 a le 12.

 (Letizia Soldà)