La Usc di Ladins

La festa del Grop Ladin de Moena se à avert en sabeda ai 4 de november col bel conzert lirich »Lingue InCantate« te sala Simonin Maza de le scole, endrezà col sostegn del Comun de Moena e l’Union di Ladins. Le sociazion »Aurona« e »Le Muse e le Dolomiti« se à metù ensema per ge portar dant a la jent n recital operistich dassen particolar. Claudio Vadagnini al piano, la sopran Victoria Burneo Sanchez, la mezsopran Oda Zoe Hochscheid e l bariton Walter Franceschini à metù dant aries e duec del repertorie lirich più cognosciù de »La Traviata«, »Il Barbiere di Siviglia«, »Don Pasquale«, »Carmen« e n muie de autres, i entrecian con passajes de l’opera lirica ladina »Aneta» componuda da Claudio Vadagnini sun libret de Fabio Chiocchetti che era stata portada dant jai egn te teater de Navalge. La prejentazion di toc é stata fata da Paolo Turri.

N conzert frut de na colaborazion che à metù ensema la musega de calità, la gaissa e la voa de far de n muie de persone. L publich à aprijià la capazità e la braura artistica e interpretativa di ciantores e del pianist. Se spera che cheste colaborazion porte te val autre ocajion de valor artistich desche chesta.

 (Monica Cigolla)