La Usc di Ladins

»I Dis de la Didatica é stac de valuta per peèr via con na strutura più organica anter Istitut Cultural Ladin e la Scola tel ciamp de la didatica«. Sabrina Rasom, diretora de la Majon di Fascegn, palesa sia sodesfazion per l bon ejit de la scomenzadiva endrezèda soraldut con l obietif de ge portèr dant ai ensegnanc la neva publicazions per bec ma ence per programèr la neva unitèdes didatiches e prejentèr i projec de neves contegnui linguistics.

Per i bec dai 0 ai 6 egn l é stat prejentà l projet de valorisazion di libres ‘Contaconties’ tras la modalità Kamishibai, n veior sistem giaponeis de contèr stories tras n picol teater sun papier. L Istitut Cultural Ladin, ensema a la maestres, à lurà su la rielaborazion di tesć e Maria Pezzedi à fat i neves dessegnes adaté per chest sistem che ge vegnarà sport a duta la scolines de la val. Per i bec picoi l é stat portà dant ence i resultac de la traduzion dal lengaz frijon de doi libres: »Met vèrda, bèrba Dui« e »Da la giava«, n projet nasciù da la colaborazion con la Frisia e l’Ambascèda de l’Olanda te la Tèlia.

»Ge aon moscià coche sion do che luron sul DILF – à dit la diretora Rasom – e aon vardà fora ensema coi ensegnanc i materiai de la Università de Busan che à na gramatica didatica per l gherdener e l badiot, volassane lurèr coi medemi prinzipies.  Percacenta ence la colaborazion con l Olfed ajache aon vedù che volon jir duc te la medema direzion, per chest se aon jà troà e condividù documenc de programazion percheche vegne metù ensema la forzes e se loare duc coi medemi obietives per enjignèr material che vegne durà e slarià fora.«

De più su La Usc de en vender ai 10 de november del 2023  (Monica Cigolla)